बिहारमध्ये पुन्हा सत्तानाट्य; नितीश कुमारांचा मुख्यमंत्रिपदाचा राजीनामा, INDIAला धक्का 

लालू प्रसाद यांच्या राष्ट्रीय जनता दलासोबत नितीश कुमारांचा संयुक्त जनता दल सत्तेत होता. राज्यातील सर्वात मोठा पक्ष असलेला राजद जेडीयूचे आमदार फोडण्याच्या तयारीत असल्याचं नितीश कुमार यांना वाटत होतं. त्यामुळे त्यांनी राजदची साथ सोडण्याचा निर्णय घेतल्याची चर्चा आहे. नितीश कुमार यांनी राजदच्या नेतृत्त्वाचे फोन घेणं बंद केलं. त्यामुळे ते भाजपसोबत जाणार असल्याची चर्चा जोर धरु लागली.

नितीश कुमार यांचं बेभरवशी राजकारण पाहता भाजपनं सावध पवित्रा घेतला. नितीश यांनी राजीनामा द्यावा, मग त्यांना पाठिंबा देऊ, असा पवित्रा भाजपनं घेतला. तर जदयूच्या नेत्यांनादेखील भाजपवर शंका होती. भाजपनं आधी पाठिंब्याचं पत्र द्यावं. मग नितीश यांनी राजीनामा द्यावा, असं मत जेडीयूतील नेत्यांचं होतं. त्यामुळे वेगळाच पेच निर्माण झाला. अखेर नितीश कुमार यांनी राजीनामा दिला. आता नव्या सरकारमध्ये भाजप सहभागी होणार की नितीश सरकारला केवळ बाहेरुन पाठिंबा देणार ते पाहणं महत्त्वाचं असेल.