Authored by कुणाल गवाणकर | महाराष्ट्र टाइम्स.कॉम | Updated: 28 Jan 2024, 11:39 am
बिहारचे मुख्यमंत्री नितीश कुमार यांनी राज्यपालांची भेट घेत पदाचा राजीनामा दिला आहे. त्यांनी महागठबंधनची साथ सोडली आहे. नितीश यांचा निर्णय इंडिया आघाडीसाठी धक्का मानला जात आहे.
![nitish 1 nitish 1](https://static.langimg.com/thumb/67144443/Maharashtra%20Times.jpg?width=540&height=405&resizemode=75)
महागठबंधनची साथ सोडून भाजपसोबत जात असलेले नितीश कुमार आज संध्याकाळी ४ वाजता पुन्हा मुख्यमंत्रिपदाची शपथ घेऊ शकतात. तसं झाल्यास ते नवव्यांदा मुख्यमंत्री होतील. नितीश कुमार यांनी मुख्यमंत्रिपदाचा राजीनामा दिला आहे. आता थोड्याच वेळात भाजपचे आमदार राज्यपालांकडे पाठिंब्याचं पत्र घेऊन पोहोचतील. यानंतर एनडीए सरकारच्या स्थापनेची प्रक्रिया सुरू होईल. पंतप्रधान नरेंद्र मोदींशी फोनवरुन संवाद साधल्यानंतर नितीश यांनी राजीनाम्याचा निर्णय घेतल्याची माहिती सुत्रांनी दिली.
लालू प्रसाद यांच्या राष्ट्रीय जनता दलासोबत नितीश कुमारांचा संयुक्त जनता दल सत्तेत होता. राज्यातील सर्वात मोठा पक्ष असलेला राजद जेडीयूचे आमदार फोडण्याच्या तयारीत असल्याचं नितीश कुमार यांना वाटत होतं. त्यामुळे त्यांनी राजदची साथ सोडण्याचा निर्णय घेतल्याची चर्चा आहे. नितीश कुमार यांनी राजदच्या नेतृत्त्वाचे फोन घेणं बंद केलं. त्यामुळे ते भाजपसोबत जाणार असल्याची चर्चा जोर धरु लागली.
नितीश कुमार यांचं बेभरवशी राजकारण पाहता भाजपनं सावध पवित्रा घेतला. नितीश यांनी राजीनामा द्यावा, मग त्यांना पाठिंबा देऊ, असा पवित्रा भाजपनं घेतला. तर जदयूच्या नेत्यांनादेखील भाजपवर शंका होती. भाजपनं आधी पाठिंब्याचं पत्र द्यावं. मग नितीश यांनी राजीनामा द्यावा, असं मत जेडीयूतील नेत्यांचं होतं. त्यामुळे वेगळाच पेच निर्माण झाला. अखेर नितीश कुमार यांनी राजीनामा दिला. आता नव्या सरकारमध्ये भाजप सहभागी होणार की नितीश सरकारला केवळ बाहेरुन पाठिंबा देणार ते पाहणं महत्त्वाचं असेल.
कुणाल गवाणकर यांच्याविषयी
महाराष्ट्र टाईम्स ऑनलाईनमध्ये सिनियर डिजिटिल कंटेट प्रोड्युसर म्हणून कार्यरत. ११ वर्षांपूर्वी वृत्तपत्रातून पत्रकारितेची सुरुवात. सकाळ, जय महाराष्ट्र, टीव्ही ९ मराठी, लोकसत्ता ऑनलाईन, न्यूज१८ लोकमत, लोकमत ऑनलाईनमधून प्रवास करत मटा ऑनलाईनपर्यंत वाटचाल; क्राईमच्या बातम्यांमध्ये हातखंडा; राजकीय, निवडणूक विषयक बातम्यांमध्ये रस.… Read More
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.